“તારું ગજુ નથી” (God’s Answer)


“તારું ગજુ નથી” (Answer by God to Me)

 

મારા પ્રણયને પામવું તારું ગજુ નથી,
અંગાર હાથે ઝાલવું તારું ગજુ નથી,

 

આ રૂપને યૌવન મહીં મગરૂબ થઈ છકો,
જાતા સમયને બાંધવું તારું ગજુ નથી,

 

શણગાર તે સારા કિધા નવલા જગત મહીં,
મારી અસરને ખાળવું તારું ગજુ નથી,

 

કો’ ધારણાનાં નામ પર પંડીત બની ગયો,
મારી સમજને આંબવું તારું ગજુ નથી,

 

પાખંડ પણ કેવા કિધા આસ્તિક બની તમે,
તરણા સહારે તારવું તારું ગજુ નથી,

 

બે-ચાર નાની ખોજથી ગ્નાની બની ફરો,
મારા ગણિતને આંકવું તારું ગજુ નથી,

 

પુણ્યો અને પાપો હજી બાકી ઘણાં “સિફર”
સંસાર સાગર લાંઘવું તારું ગજુ નથી,

 

“સિફર”

Advertisements

“તો થાય કૈ”


“તો થાય કૈ”

 

જોમ જો વ્યોમે અડે તો થાય કૈ,
કાં’ તમન્ના ટળવળે તો થાય કૈ,

 

ગુલ અને ગુલશન તમારા હો છતાં,
આંખમાં જો રણ રમે તો થાય કૈ,

 

છો પસરતી ખુશ્બુ તારી ચોતરફ,
માયલો જો મઘમઘે તો થાય કૈ,

 

હોય રડતું પિંજરે પંખી છતાં,
આંખ કોરી કટ મળે તો થાય કૈ,

 

પાસ આવીને અધર સ્પર્શ્યા જ ત્યાં,
લાગણી ખૂટી પડે તો થાય કૈ,

 

કામ આવે ના કદી હથિયાર પણ,
વીર ને પોરસ ચડે તો થાય કૈ,

 

આમ કાં’ આગળ ધરો બખ્તર “સિફર”,
ઘાવ ખુદ છાતી જીલે તો થાય કૈ.

 

“સિફર”

“શું દઉ તને?”


શું દઉ તને?

તારા વિરહનાં વ્યાસની પળપળ શું દઉ તને?

ઠુંઠા થયેલા વ્રુક્ષનાં ઉપવન શું દઉ તને?

પાછી ફરેલી લાગણીની શી દશા કરી?

અત્તર નિચોવી ફૂલનાં કણકણ શું દઉ તને?

સંબંધનો આ તાંતણો ના તાણજો તમે,

વચમાં પડે જો ગાંઠ તો સમજણ શું દઉ તને?

ખાલી પડેલા અસ્તબલમાં ડાબલા થયાં,

હોંકાર કે ભણકારની ધડબડ શું દઉ તને?

મળ્યા પછીની તિક્તતા ના પાલવે “સિફર”,

ખાલી હ્રદયની રિક્તતા મણમણ શું દઉ તને?

“સિફર”

“ઘનઘોરતા…”


“ઘનઘોરતા…”

છે અહીં ઘનઘોરતા વાતાવરણમાં,

તે છતાં હું શૂન્યતા કેરી અસરમાં

આજ મારા હાથની રેખા જ કે’શે,

કોણ છે એ નામ જે આવે રટણમાં,

આંખનાં આ ભાવને હું શે છુપાવું,

દર્પણે આવું અને ભીંજુ શરમમાં,

વાદળી વરસે પછી તો થાય જન્નત,

છાપ પગલાની મળે આખી મજલમાં,

રંગ સંધ્યાનો બરોબર મેળ ખાતો,

સેંથીનું સિંદુર “સિફર” ભાલે તિલકમાં

                        “સિફર”

પહેલો વરસાદ….


પહેલો વરસાદ….

 

ચાલ સખી આપણ પલળવાને જાઇએ,

પહેલા વરસાદમાં સંગે મળીને,

હાથમાં લઇ હાથ અને રંગે ચડીને,

આપણ બંને જઈ ન્હાઇએ

                                                      ચાલ સખી…….

મીઠા આ મેહ જેવો પ્રીયતમ નો પ્રેમ છે,

તારો હું છું ને સખી તોયે તને વ્હેમ છે,

હૈયાની વાતોને શબ્દે વણીને,

ચાલ એકરૂપ થઈ જાઇએ,

                                                       ચાલ સખી…….

વનડાને મનડાને ઓઢણીના કોડ છે,

લીલુડો રંગ એના કાળજાની કોર છે,

જુગજુગથી ઝંખતી તપતી ધરાની,

તરસ્યુંને આજે બુજાવીએ,

                                                      ચાલ સખી…….

વાંછટથી હૈયું કઈ ભીંજે નહી ને,

થોડામાં મનડું કઈ રીજે નહી રે,

માવઠાને મેલી ને સાંબેલા ધારની,

હેલી મા મનડું પલાળીયે,

                                                       ચાલ સખી…….

વાયરા ઓ વાયરા પાલવને છેડ મા,

ફરકે છે લટ તારી વાહરની લ્હેર મા,

ખોળે સુવાડીને વાળે ટપકતા,

ટીપેથી માથું ભીંજાવીયે.

                                                       ચાલ સખી…….

                                  “સિફર”

મેહુલીયો રે…..


           મેહુલીયો રે…..

         હારે મેહુલીયો રે…..

મેહુલીયો મારો પરભવનો વેરી,

એણે સુતી જગાડી મને મેલી,

                                                    હારે મેહુલીયો રે…..

 

તારી તે વિજળી જબક જબ જબકે,

આવીને આઘેથી આંખ્યુમાં ખટકે,

રાત્યુંના શમણાંને પડતા મેલાવીને,

જબકી જગાડે મને એવી,

                                                     હારે મેહુલીયો રે…..

અષાઢી વાદળી ગડક ગડ ગડકે,

જાણે પીયુજીની હોકલી ગગડે,

સાયબાની ઘોડલીનાં ડાબલાનાં ભણકારા,

રોજ કરતા રે મુને ઘેલી,

                                                    હારે મેહુલીયો રે…..

હૈયું મારૂ જ્યારે થડક થડ થડકે,

બાળકની જેમ મન ભેટવાને તડપે,

ત્યારે મેરામણ માજા મુકાવીને,

તાણતો જાય એની ભેળી,

                                                        હારે મેહુલીયો રે…..

મેહુલીયો આવ્યો ને ધરતી ભીંજાણી,

કોરી તલાવડીમા ફૂટી સરવાણી,

મારા આ તનમન બેઉ છલકી પડે એવી,

આપી આનંદની હેલી,

હારે મેહુલીયો રે…..

          “સિફર”

“દ્વાર“ (ગઝલનું જ એક રૂપ “તસ્બી”)


“દ્વાર“

(ગઝલનું જ એક રૂપ “તસ્બી”)

તું “સિફર” નો દ્વાર ખખડાવે અને,

જાંજવા ઝાકળમાં પલટાવે અને,

વાંસળી હોઠે ધરીને હું ઉભો,

તું મધૂરા સૂર છલકાવે અને,

મન મુકીને રાસ રમવાને સખી,

કો’ અનોખા સાઝ વગડાવે અને,

દઇ હથેળી આજ મારા હાથમાં,

બેઉની તકદીર સરખાવે અને,

બંધ રાખી બારણાંને બારીઓ,

પ્રેમભીંની રાત સરજાવે અને,

પાંગરે છે વેલ જ્યારે પ્રેમની,

મોહિની કો’ જાળ વિટળાવે અને,

મોહિની કો’ જાળ વિટળાવે અને,

તું “સિફર” નો દ્વાર ખખડાવે અને,

“સિફર”