Archive for ઓગસ્ટ, 2011

“તો થાય કૈ”


“તો થાય કૈ”

 

જોમ જો વ્યોમે અડે તો થાય કૈ,
કાં’ તમન્ના ટળવળે તો થાય કૈ,

 

ગુલ અને ગુલશન તમારા હો છતાં,
આંખમાં જો રણ રમે તો થાય કૈ,

 

છો પસરતી ખુશ્બુ તારી ચોતરફ,
માયલો જો મઘમઘે તો થાય કૈ,

 

હોય રડતું પિંજરે પંખી છતાં,
આંખ કોરી કટ મળે તો થાય કૈ,

 

પાસ આવીને અધર સ્પર્શ્યા જ ત્યાં,
લાગણી ખૂટી પડે તો થાય કૈ,

 

કામ આવે ના કદી હથિયાર પણ,
વીર ને પોરસ ચડે તો થાય કૈ,

 

આમ કાં’ આગળ ધરો બખ્તર “સિફર”,
ઘાવ ખુદ છાતી જીલે તો થાય કૈ.

 

“સિફર”

“શું દઉ તને?”


શું દઉ તને?

તારા વિરહનાં વ્યાસની પળપળ શું દઉ તને?

ઠુંઠા થયેલા વ્રુક્ષનાં ઉપવન શું દઉ તને?

પાછી ફરેલી લાગણીની શી દશા કરી?

અત્તર નિચોવી ફૂલનાં કણકણ શું દઉ તને?

સંબંધનો આ તાંતણો ના તાણજો તમે,

વચમાં પડે જો ગાંઠ તો સમજણ શું દઉ તને?

ખાલી પડેલા અસ્તબલમાં ડાબલા થયાં,

હોંકાર કે ભણકારની ધડબડ શું દઉ તને?

મળ્યા પછીની તિક્તતા ના પાલવે “સિફર”,

ખાલી હ્રદયની રિક્તતા મણમણ શું દઉ તને?

“સિફર”