“તો થાય કૈ”

 

જોમ જો વ્યોમે અડે તો થાય કૈ,
કાં’ તમન્ના ટળવળે તો થાય કૈ,

 

ગુલ અને ગુલશન તમારા હો છતાં,
આંખમાં જો રણ રમે તો થાય કૈ,

 

છો પસરતી ખુશ્બુ તારી ચોતરફ,
માયલો જો મઘમઘે તો થાય કૈ,

 

હોય રડતું પિંજરે પંખી છતાં,
આંખ કોરી કટ મળે તો થાય કૈ,

 

પાસ આવીને અધર સ્પર્શ્યા જ ત્યાં,
લાગણી ખૂટી પડે તો થાય કૈ,

 

કામ આવે ના કદી હથિયાર પણ,
વીર ને પોરસ ચડે તો થાય કૈ,

 

આમ કાં’ આગળ ધરો બખ્તર “સિફર”,
ઘાવ ખુદ છાતી જીલે તો થાય કૈ.

 

“સિફર”

Advertisements